शेतात जाते असे सांगून आईने दोन मुलांना स्कार्फने कमरेला बांधले आणि…

कर्जत : शेतात खुरपणीसाठी जाते, असे सांगून बाहेर पडलेल्या विवाहितेने आपल्या दोन लहान मुलांना स्कार्फच्या सहाय्याने स्वत:च्या कमरेला बांधले आणि विहिरीत उडी घेतली. यामध्ये पाच वर्षांचा मुलगा बचावला असून दोन वर्षांच्या मुलासह आईचा बुडून मृत्यू झाला आहे. कर्जत तालुक्यातील डोंबाळवाडी गावात गुरुवारी ही घटना घडली. या महिलेच्या आत्महत्येमागील नेमके कारण अद्याप स्पष्ट झालेले नाही. तालुक्यातील निंबे येथील रहिवासी असलेल्या वैशाली मंगेश गलांडे (वय २७) यांनी गुरुवारी त्यांच्या माऊली (वय ५) व ओंकार (वय २) या दोन मुलांना सोबत घेतले. त्यांच्या डोंबाळवाडी शिवारात असलेल्या शेतात खुरपणी करण्यासाठी जाते असून सांगून घराबाहेर पडल्या. त्यानंतर त्यांनी दोन्ही मुलांना स्वत:च्या कमरेला स्कार्फच्या सहाय्याने बांधले व विहीरीत उडी मारली. मोठा मुलगा माऊली गलांडे हा स्कार्फमधून सुटला. त्यामुळे तो वाचला. मात्र, आई व लहान मुलगा यांचा पाण्यात बुडून मृत्य झाल्याचे नंतर समोर आले. घटना घडल्यानंतर तेथे मेंढ्या चारण्यासाठी आलेले विश्वनाथ काशिनाथ मासाळ यांनी सर्वप्रथम हे दृश्य पाहिले. त्यांना सुरुवातीला एक मुलगा पाण्यावर तरंगताना दिसला. त्यांनी गलांडे यांना कळविले. त्यावर राजेश गलांडे आणि विष्णू बाजीराव गलांडे विहीरीकडे पळत आले. राकेश याने पाण्यात उडी मारून माऊलीला पाण्यातून बाहेर काढले. त्याला तातडीने रुग्णालयात नेण्यात आले. तो बचावला आहे. मात्र, मधल्या काळात त्याची आई वैशाली आणि धाकटा भाऊ कोठे दिसले नाहीत. त्यामुळे त्यांना संशय आला. त्यांनी पुन्हा विहिरीत जाऊन शोधाशोध केली. विहिरीतील पाणी मोटारीच्या सहाय्याने उपसण्यात आले. पाणी कमी झाल्यावर तरुणांनी पाण्यात उड्या घेऊन पाहणी केली. तेव्हा आई आणि मुलगा हाती लागले. त्यांना रुग्णालयात नेण्यात आले. मात्र, तिथे डॉक्टरांनी त्यांना मृत घोषित केले. याची माहिती मिळाल्यानंतर कर्जतचे पोलीस निरीक्षक चंद्रशेखर यादव यांच्यासह पोलिसांनी तेथे धाव घेतली. अधिक चौकशी सुरू आहे. या महिलेने हे टोकाचे पाऊल का उचलेले हे अद्याप स्पष्ट झाले नाही. त्या दृष्टीने पोलीस तपास करीत आहेत.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/3IZpY1t
https://ift.tt/322C8pz