'गोव्यात काँग्रेस आणि राष्ट्रवादी काँग्रेस-शिवसेना यांच्यात युती होऊ शकली नाही, परंतु...' - पी. चिदंबरम

नवी दिल्ली : गोवा विधानसभा निवडणुकीसाठी सर्वतोपरी प्रयत्न करूनही काँग्रेस आणि राष्ट्रवादी काँग्रेस-शिवसेना यांच्यात युती होऊ शकली नाही, परंतु आमची मैत्री कायम राहील, असा विश्वास काँग्रेसचे ज्येष्ठ नेते पी. चिदंबरम यांनी रविवारी व्यक्त केला. तसेच निवडणुकीनंतर राष्ट्रवादी, शिवसेनेसोबत एकत्र काम करण्याची संधी काँग्रेस शोधत राहील, असेही ते म्हणाले. चिदंबरम यांनी काँग्रेससोबत युती न केल्याने तृणमूल काँग्रेसलाही लक्ष्य केले. पक्षाने युतीच्या प्रस्तावाऐवजी काँग्रेस नेत्यांना आपल्या बाजूने करण्याचा प्रयत्न सुरूच ठेवला. तृणमूल काँग्रेससोबत चर्चा करण्याची सूचना पक्षाच्या नेतृत्वाकडून मिळाली नाही. आमच्या नेतृत्वाने सर्व तथ्य आणि परिस्थिती विचारात घेतली होती, याची मला खात्री आहे, असे चिदंबरम यांनी वृत्तसंस्थेला दिलेल्या मुलाखतीत म्हटले आहे. गोव्याची निवडणूक ही काँग्रेस (गोवा फॉरवर्ड पक्षासोबत) आणि भाजप यांच्यामधील आहे आणि आम्ही मताधिक्याने सहज जिंकू शकू, असा विश्वास त्यांनी व्यक्त केला. अन्य विरोधी पक्षांशी विशेषत: राष्ट्रवादी काँग्रेस आणि शिवसेनेशी काँग्रेसची युती का होऊ शकली नाही, याबाबत चिदंबरम यांना विचारले असता, 'आम्ही प्रयत्न केला. त्यांनी काही प्रस्ताव सादर केले. आम्ही काही केले. परंतु सर्वोतोपरी प्रयत्न करूनही आमचे एकमत होऊ शकले नाही,' असे चिदंबरम यांनी नमूद केले. गोव्यात राहुल यांची सभा दरम्यान, काँग्रेस नेते राहुल गांधी २ फेब्रुवारीला संखालिम येथे आयोजित करण्यात आलेल्या सभेला संबोधित करणार आहेत, अशी माहिती काँग्रेसचे गोव्याचे प्रदेशाध्यक्ष गिरीश चोडणकर यांनी रविवारी दिली. या विधानसभा मतदारसंघातून मुख्यमंत्री प्रमोद सावंत निवडणूक लढवत आहेत. राज्यातील ४० मतदारसंघांत लावण्यात आलेल्या स्क्रीनवर राहुल गांधी यांचे भाषण प्रसारित केले जाणार आहे. राहुल गांधी पक्षाचा जाहीरनामाही प्रसिद्ध करणार आहेत, असे चोडणकर यांनी सांगितले. अमित शहा गोव्यात आगामी विधानसभा निवडणुकीच्या पार्श्वभूमीवर केंद्रीय गृहमंत्री अमित शहा रविवारी गोव्यामध्ये एकदिवसीय दौऱ्यासाठी दाखल झाले. या दौऱ्यात ते काही सभांना हजेरी लावणार असून, घरोघरी करण्यात येत असलेल्या प्रचार मोहिमांमध्ये सहभाग घेणार आहेत. राज्याचे भाजपचे निवडणूक प्रमुख देवेंद्र फडणवीस यांनी डॅबोलिम विमानतळावर शहांचे स्वागत केले. यावेळी केंद्रीय मंत्री श्रीपाद नाईक, मुख्यमंत्री प्रमोद सावंत, भाजपचे प्रदेशाध्यक्ष सदानंद शेट तानवडे उपस्थित होते.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/BpLdOoW0m
https://ift.tt/QFxqCcKaY