आधी गोळ्या घातल्या, नंतर कुऱ्हाडीचे वार, शिवसेना पदाधिकाऱ्याची राहत्या घरी निर्घृण हत्या

यवतमाळ : तालुक्यातील भांब राजा येथील रहिवासी शिवसेना पदाधिकारी, कृषी उत्पन्न बाजार समिती संचालक तथा ग्रामपंचायत सदस्य सुनील नारायणराव डिवरे ( Death) यांची राहत्या घरात अज्ञात तीन व्यक्तींनी बंदुकीच्या गोळ्या घालून हत्या केली. तसंच त्यांच्यावर कुऱ्हाडीचे वारही करण्यात आले. यावेळी तीन राऊंड फायर झाल्याचे वृत्त आहे. हत्येची ही गंभीर घटना आज गुरुवारी रात्री ८ वाजताच्या सुमारास घडली. सुनील नारायणराव डिवरे (४०) रा. भांब राजा असे गोळ्या घालून हत्या करण्यात आलेल्या शिवसेना पदाधिकाऱ्याचे नाव आहे. सुनील नारायणराव डिवरे यवतमाळ स्थानिक कृषी उत्पन्न बाजार समितीचे संचालक होते. तसेच भांब राजा ग्रामपंचायतीचे सदस्य होते. गोळीबार झाल्यानंतर त्यांना तत्काळ जिल्हा शासकीय रुग्णालयात दाखल करण्यात आले. परंतु प्रचंड रक्तस्राव झाल्यामुळे त्यांचा जागीच मृत्यू झाल्याचे डॉक्टरांनी घोषित केले. नेमकी ही हत्या कोणत्या कारणामुळे झाली, याबाबत अद्याप माहिती समोर आलेली नाही. शासकीय रुग्णालयात डिवरे यांचे समर्थक मोठ्या प्रमाणात जमले होते. हत्या झाल्याची बातमी पसरताच काही काळ भांब राजा परिसरात तणावाचे वातावरण निर्माण झाले होते. त्यामुळे तेथे पोलीस बंदोबस्त लागला होता. तसेच पोलिसांनी घटनास्थळाचा पंचनामा करुन गुन्हा दाखल करण्याची प्रक्रिया सुरु केली होती.

from Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times https://ift.tt/O9xfwKQJH
https://ift.tt/2D4KCtUAj