सरत्या वर्षात या मराठी कलाकारांच्या अभिनयाचं झालं कौतुक

बाजीप्रभूंना मुजरा एकदा एक ऐंशी-पंच्याऐंशी वयाचे गृहस्थ मला खास भेटायला आले होते. त्यांनी मला पाहताच थेट माझे पायच धरले. ते आजोबा म्हणाले, 'आज बाजीप्रभू देशपांडे असते तर ते तुमच्यासारखेच असते. तुम्ही त्यांची व्यक्तिरेखा अगदी चोख साकारत आहात. तुमचं दिसणं, तुमचा वावर प्रत्येक क्षणी प्रभूंची आठवण करून देतो. मालिकेच्या माध्यमातून आम्ही बाजी प्रभूंना पाहत आहोत, अनुभवत आहोत असंच वाटतं.' त्यांचे शब्द ऐकून मला अक्षरशः भरून आलं. मी आजोबांना हाताला धरून उठवलं आणि कडकडून मिठी मारली. मला अभिनयासाठी मिळालेली ही एक विलक्षण पोचपावती आहे. - अजिंक्य देव (बाजीप्रभू देशपांडे - जय भवानी जय शिवाजी) बहीण असावी मीराताईसारखी मालिकेतली प्रेमकथा, ग्लॅमर यापलीकडील काही इंस्टाग्राम मेसेजेसनी माझं लक्ष वेधून घेतलं. 'आम्हालाही मीराताईसारखी बहीण असावी. तिच्यासारखी काळजी घेणारी, ठामपणे पाठीशी उभी राहणारी बहीण आपल्यालाही असायला हवी, असं खूप वाटतं', असं तीन-चार जणांनी नमूद केलं होतं. तर 'मीरा आणि आदिराज हे मालिकेत उच्चशिक्षित डॉक्टर आहेत. त्यांनी जपलेल्या सामाजिक बांधिलकीचं खूप कौतुक वाटतं आणि हे पाहून काम करायला आणखी हुरूप येतो,' असं एका मेडिकलला असलेल्या विद्यार्थिनीनं, होऊ घातलेल्या डॉक्टरनं सांगितलं होतं. आपल्या व्यक्तिरेखेशी प्रेक्षक इतके जोडले जातात, त्यांना ती आपलीशी वाटते, ती त्यांच्या घरातली वाटते याचा खूप आनंद आहे. - (मीरा - अजूनही बरसात आहे) काका-काकूंनी केलं कौतुक मी बडोद्यात लहानाची मोठी झालीय. मला लहानपणापासून ओळखणाऱ्या सोसायटीतल्या काका-काकूंनी माझे याआधीचे मराठी चित्रपट पाहिले नव्हते. पण हे सगळे काका-काकू माझी मालिका आवडीनं दररोज अगदी न चुकता पाहतात. माझ्या आईवडिलांना आवर्जून भेटून आवडलेल्या भागाबद्दल सांगतात. आपल्या जवळच्या माणसांकडून मिळालेली कौतुकाची थाप माझ्यासाठी खूप विशेष आहे. आणखी एक गंमत म्हणजे दोन वर्षांपूर्वी माझ्या मामेबहिणीच्या लग्नाला मी गेले होते. पण तेव्हा अभिनेत्री म्हणून मी माझी ओळख करून दिली नव्हती. मालिकेतील नेहा कामत आपल्या घरच्या लग्नाला आली होती, हे त्यांना कळलं तेव्हा त्यांनाही खूप अप्रूप वाटलं. त्यांचं सगळं कुटुंब आमची मालिका नियमितपणे पाहतं. - प्रार्थना बेहेरे (नेहा कामत - माझी तुझी रेशीमगाठ) आपला माणूस वाटतोस २०२१ या वर्षात मी 'फिल्मफेअर अॅवॉर्ड्स'चं सूत्रसंचालन केलं. इतक्या भव्यदिव्य पुरस्कार सोहळ्याचं सूत्रसंचालन करण्याची माझी पहिलीच वेळ होती. त्यानंतर 'सिद्धार्थ करू शकत नाही अशी कोणतीच गोष्ट नाही' अशी एक प्रतिक्रिया मला आली. आपण प्रयत्न केले तर आपण काहीही साध्य करू शकतो, याची प्रचिती आली. 'बिग बॉस मराठी' च्या पहिल्या भागात मी महेश मांजरेकर सरांबरोबर निवेदनात एक वेगळा प्रयोग करून पाहिला. तो दिवस या वर्षातील माझ्यासाठीचा एक अनोखा अनुभव होता. सध्या सुरू असलेल्या 'हे तर काहीच नाही' या विनोदी किस्यांच्या मैफिलीबाबातही प्रेक्षक भरभरून बोलतात. 'तू जसा आहेस तसाच कार्यक्रमात दिसतोस. अगदी आपला माणूस वाटतोस. तुझ्यातील ऊर्जा आमच्यातही संचारते.' ही दाद ऐकल्यावर खूप छान वाटतं. - सिद्धार्थ जाधव (हे तर काहीच नाही) डॉक्टरांकडून कौतुक चंद्रकांत कुलकर्णी दिग्दर्शित 'मन सुद्द तुझं' ही मालिका मानसिक आरोग्याबाबत जागरूकता निर्माण करणारे भाग प्रदर्शित करते. ही मालिका मनोविकारतज्ज्ञ डॉ. नंदू मूलमुले यांच्या पुस्तकावर आधारित आहे. डॉ. मूलमुले यांचा एके दिवशी मला फोन आला. 'तू उत्तम भूमिका साकारत आहेस. छान काम करत आहेस. गोड आणि लाघवी अशी मनोविकारतज्ज्ञाची प्रतिमा तू प्रेक्षकांच्या मनात निर्माण करत आहेस. मनोविकारतज्ज्ञ-मानसोपचारतज्ज्ञ यांच्या समूहातूनही या मालिकेचं विशेष कौतुक होत आहे.' डॉक्टरांची ही प्रतिक्रिया माझ्यासाठी खूप महत्त्वाची आणि खास आहे. या क्षेत्रात कार्यरत असणाऱ्या मंडळींना आपला अभिनय आवडतोय, हे ऐकून खूप बरं वाटलं. - स्वप्निल जोशी (मनोविकारतज्ज्ञ - मन सुद्द तुझं) शब्दांकन गौरी आंबेडकर, एसएनडीटी विद्यापीठ

from Entertainment News in Marathi: Celebrity News and Gossips Online | Maharashtra Times https://ift.tt/3FF0JiH
https://ift.tt/3Hn4XMC